Iran War Impact: મોંઘવારીનો ઝટકો: દિલ્હીમાં પેટ્રોલ ₹98 ને પાર, દૂધ પણ થયું મોંઘું
મધ્ય પૂર્વ (Middle East) માં વધતા જતા યુદ્ધના તણાવ અને વૈશ્વિક બજારમાં ક્રૂડ ઓઈલની આસમાને પહોંચેલી કિંમતોની સીધી અસર હવે સામાન્ય ભારતીયોના રસોડા અને ખિસ્સા પર જોવા મળી રહી છે. આજે, 15 મેના રોજ ઈંધણની કિંમતોમાં થયેલા જંગી વધારાએ સામાન્ય માણસની કમર તોડી નાખી છે. ઈરાન અને અમેરિકા વચ્ચેના સંઘર્ષને કારણે ઊર્જા પુરવઠો ખોરવાતા આર્થિક સંકટ ઘેરું બન્યું છે.
પેટ્રોલ અને ડીઝલની કિંમતોમાં તોતિંગ વધારો
છેલ્લા ઘણા સમયથી સ્થિર રહેલા ઈંધણના ભાવમાં આજે તેલ કંપનીઓએ મોટો ફેરફાર કર્યો છે. તેલ કંપનીઓના વધતા નુકસાનને ભરપાઈ કરવા માટે નીચે મુજબ ભાવ વધારો અમલી બન્યો છે:
પેટ્રોલ: પ્રતિ લિટર ₹ 3.14 નો વધારો.
ડીઝલ: પ્રતિ લિટર ₹ 3.11 નો વધારો.
રાજધાની દિલ્હીમાં નવી કિંમતો: આ વધારા બાદ દેશની રાજધાનીમાં એક લિટર પેટ્રોલની કિંમત ₹ 97.91 અને ડીઝલની કિંમત ₹ 90.78 પર પહોંચી ગઈ છે. નિષ્ણાતોના મતે, ડીઝલના ભાવ વધવાથી ટ્રાન્સપોર્ટેશન ખર્ચમાં વધારો થશે, જેની સીધી અસર શાકભાજી અને અન્ય જીવનજરૂરી ચીજવસ્તુઓના ભાવ પર પડશે.
દૂધના ભાવમાં પણ ઝીંકાયો વધારો
માત્ર ઈંધણ જ નહીં, પરંતુ રોજિંદા જીવનની અનિવાર્ય જરૂરિયાત એવા દૂધના ભાવમાં પણ મોટો વધારો કરવામાં આવ્યો છે. અમૂલ (Amul), મધર ડેરી (Mother Dairy) અને સાંચી (Sanchi) જેવી અગ્રણી ડેરીઓએ 14 મેથી નવી દરો લાગુ કરી દીધી છે.
નવી દૂધની દરોની વિગત:
ટોન્ડ મિલ્ક: ₹ 58 થી વધીને હવે ₹ 60 પ્રતિ લિટર.
ડબલ ટોન્ડ મિલ્ક: ₹ 54 પ્રતિ લિટર.
ગાયનું દૂધ: ₹ 60 થી વધીને હવે ₹ 62 પ્રતિ લિટર.
દૂધ ઉત્પાદક કંપનીઓનું કહેવું છે કે ચારાના વધતા ભાવ અને ટ્રાન્સપોર્ટેશન ખર્ચમાં થયેલા વધારાને કારણે કિંમતો વધારવી અનિવાર્ય બની હતી.
શા માટે વધી રહી છે મોંઘવારી?
વૈશ્વિક સ્તરે ઈરાન યુદ્ધને કારણે ક્રૂડ ઓઈલના ભાવ 110-120 ડોલર પ્રતિ બેરલની આસપાસ ટ્રેડ થઈ રહ્યા છે. ભારત તેની જરૂરિયાતનું 80% થી વધુ તેલ આયાત કરે છે, પરિણામે આંતરરાષ્ટ્રીય અસ્થિરતાની સીધી અસર સ્થાનિક બજાર પર પડે છે. પેટ્રોલ, ડીઝલ, સીએનજી અને હવે દૂધના ભાવ વધવાથી મધ્યમ અને ગરીબ વર્ગના બજેટ ખોરવાઈ ગયા છે.
