ગરીબીમાં લોટ ભીનો: શું પીએમ મોદીની ‘ત્યાગ’ની અપીલ સરકારની આર્થિક નિષ્ફળતા છે?
વડાપ્રધાન નરેન્દ્ર મોદીએ હૈદરાબાદમાં દેશવાસીઓને સોનું ન ખરીદવા અને સંસાધનોમાં કાપ મૂકવાની જે અપીલ કરી હતી, તેને લઈને વિપક્ષી નેતાઓએ સરકારને આડે હાથ લીધી છે. કોંગ્રેસ અધ્યક્ષ મલ્લિકાર્જુન ખડગેએ આકરી પ્રતિક્રિયા આપતા જણાવ્યું કે, “જ્યારે દેશ ‘ગરીબીમાં લોટ ભીનો’ જેવી સ્થિતિમાંથી પસાર થઈ રહ્યો છે, ત્યારે વડાપ્રધાન લોકોને બચતના પાઠ ભણાવી રહ્યા છે.”
ખડગેએ યાદ અપાવ્યું કે ૨૮ ફેબ્રુઆરીએ પશ્ચિમ એશિયામાં યુદ્ધ શરૂ થયું ત્યારથી જ કોંગ્રેસ પાર્ટીએ અર્થતંત્રના કથળતા હાલ, રૂપિયાનું ધોવાણ, અને પેટ્રોલ-ડીઝલના વધતા ભાવ મુદ્દે સરકારને ચેતવી હતી. તેમણે સવાલ કર્યો કે જ્યારે મોંઘવારી અને ખાદ્ય સુરક્ષા સામે જોખમ હતું, ત્યારે વડાપ્રધાન રોડ-શો અને ચૂંટણી પ્રચારમાં વ્યસ્ત કેમ હતા? ખડગેએ તુલસીદાસજીની પંક્તિ “પર ઉપદેશ કુશળ બહુતેરે” ટાંકીને કહ્યું કે પોતાની નિષ્ફળતાનો ટોપલો જનતા પર ઢોળવો એ અયોગ્ય છે.
રાહુલ ગાંધીના પ્રહાર: “ત્યાગની માંગ એ સરકારની નિષ્ફળતા”
લોકસભામાં વિપક્ષના નેતા રાહુલ ગાંધીએ પણ સોશિયલ મીડિયા પ્લેટફોર્મ ‘X’ પર પોસ્ટ કરીને વડાપ્રધાન પર નિશાન સાધ્યું હતું. તેમણે કહ્યું કે જનતાને સોનું ન ખરીદવા, વિદેશ ન જવા, અને પેટ્રોલનો વપરાશ ઘટાડવા કહેવું એ સરકારની ૧૨ વર્ષની આર્થિક નીતિઓની નિષ્ફળતાનો પુરાવો છે.
રાહુલ ગાંધીએ લખ્યું:
“લોકોને કહેવામાં આવે છે કે સોનું ન ખરીદો, તેલ ઓછું વાપરો, મેટ્રોમાં મુસાફરી કરો અને ઘરેથી કામ કરો. આ ઉપદેશ નથી, પણ એક એવી સરકારની લાચારી છે જે હવે દેશ ચલાવવામાં અસમર્થ છે.”
તેમણે વધુમાં આક્ષેપ કર્યો કે જ્યારે પણ મુશ્કેલી આવે છે, ત્યારે સરકાર પોતાની જવાબદારી સ્વીકારવાને બદલે સામાન્ય જનતા પાસેથી ‘ત્યાગ’ની માંગણી કરવા લાગે છે.
વડાપ્રધાનનો પક્ષ: યુદ્ધ અને સપ્લાય ચેઈનનો પડકાર
બીજી તરફ, વડાપ્રધાન મોદીએ પોતાના બચાવમાં કહ્યું છે કે કેન્દ્ર સરકાર યુદ્ધના પ્રતિકૂળ અસરોથી સામાન્ય નાગરિકોને બચાવવા માટે દિવસ-રાત પ્રયત્નશીલ છે. તેલંગાણાની રેલીમાં તેમણે સ્પષ્ટ કર્યું હતું કે વૈશ્વિક યુદ્ધોને કારણે ખાતર અને પેટ્રોલિયમ પેદાશોની સપ્લાય ચેઈન ખોરવાઈ છે, જેના કારણે કિંમતોમાં અસહ્ય વધારો થયો છે. તેમણે દેશના અર્થતંત્રને સ્થિર રાખવા માટે નાગરિકોના સહયોગને ‘રાષ્ટ્રસેવા’ ગણાવી હતી.
શું છે અસલી વિવાદ?
મુખ્ય વિવાદ આર્થિક આંકડાઓ અને સામાન્ય માણસની ખરીદશક્તિ વચ્ચેનો છે. એક તરફ સરકાર વિદેશી મુદ્રા ભંડાર (Forex Reserve) બચાવવા માટે આયાત ઘટાડવા માંગે છે, તો બીજી તરફ વિપક્ષ તેને સામાન્ય જનતાના હકો પર તરાપ અને મોંઘવારી રોકવામાં સરકારની અસમર્થતા ગણાવી રહ્યો છે.
