Air india: હવાઈ મુસાફરી થશે મોંઘી! એવિએશન સેક્ટરમાં સંકટ, એર ઈન્ડિયાએ ઓપરેટિંગ ખર્ચ ઘટાડવા ફ્લાઈટ્સ ઘટાડી
જેટ ફ્યુઅલ (ATF) ના સતત વધતા ભાવે ભારતીય એવિએશન સેક્ટરની કમર તોડી નાખી છે અને હવે તેની સીધી અસર ફ્લાઇટ ઓપરેશન્સ પર જોવા મળી રહી છે. વધતી જતી ઓપરેટિંગ કોસ્ટને કારણે એર ઈન્ડિયાએ મોટો નિર્ણય લેતા દરરોજની લગભગ 100 ફ્લાઈટ્સમાં કાપ મૂકવાની જાહેરાત કરી છે. આ ફેરફારોની અસર સ્થાનિક અને આંતરરાષ્ટ્રીય એમ બંને રૂટ્સ પર જોવા મળશે.
આજે એટલે કે 1 મે 2026 ના રોજ, મધ્ય પૂર્વમાં ચાલી રહેલા સંઘર્ષના કારણે વૈશ્વિક તેલની કિંમતોમાં ભારે ઉછાળો આવ્યો છે. આંતરરાષ્ટ્રીય એરલાઇન્સ માટે જેટ ફ્યુઅલ (ATF) ની કિંમતમાં પ્રતિ કિલોલીટર 76.55 યુએસ ડોલરનો વધારો થયો છે. એપ્રિલના અંત સુધીમાં સરેરાશ કિંમત પ્રતિ બેરલ $179.46 સુધી પહોંચી ગઈ છે, જે ફેબ્રુઆરીની સરખામણીમાં આશરે 80% વધુ છે. એરલાઇન્સના કુલ ખર્ચમાં ઇંધણનો હિસ્સો લગભગ 40% જેટલો હોય છે, તેથી આ વધારાની સીધી અસર એરલાઇન્સના નફા પર પડી રહી છે.
કયા રૂટ્સ પર કાપ મૂકવામાં આવશે?
એર ઈન્ડિયા હાલમાં દરરોજ અંદાજે 1,100 ફ્લાઈટ્સનું સંચાલન કરે છે, પરંતુ જૂન મહિનાના શેડ્યૂલથી તેમાં મોટો ઘટાડો જોવા મળશે. ખાસ કરીને એવા લાંબા અંતરના રૂટ્સ જ્યાં ઈંધણનો વપરાશ સૌથી વધુ છે, ત્યાં ફ્લાઈટ્સ ઘટાડવામાં આવશે:
યુરોપ અને ઉત્તર અમેરિકા: પાકિસ્તાની એરસ્પેસ બંધ હોવાના કારણે આ રૂટ્સ પર લાંબો રસ્તો અપનાવવો પડે છે, જેનાથી ઈંધણ અને ક્રૂ ખર્ચ બંનેમાં વધારો થયો છે.
ઓસ્ટ્રેલિયા અને સિંગાપોર: આ પ્રમુખ રૂટ્સ પર પણ ફ્લાઈટ્સની સંખ્યા ઓછી કરવામાં આવશે.
એરલાઇન્સની મજબૂરી અને સરકાર પાસે માંગ
ફેડરેશન ઓફ ઇન્ડિયન એરલાઇન્સ (FIA), જેમાં ઇન્ડિગો, એર ઇન્ડિયા અને સ્પાઇસજેટ સામેલ છે, તેમણે સરકારને ચેતવણી આપી છે કે જો ખર્ચ ઘટાડવા માટે કોઈ નક્કર પગલાં લેવામાં નહીં આવે, તો સેવાઓ સ્થગિત કરવી પડી શકે છે. દિલ્હીમાં ATF ના ભાવ માર્ચની સરખામણીમાં લગભગ બમણા થઈ ગયા છે. એર ઈન્ડિયાના અધિકારીઓના જણાવ્યા અનુસાર, ઘણા રૂટ્સ પર એરલાઈન પોતાનો મૂળ ખર્ચ પણ વસૂલ કરી શકતી નથી, તેથી ફ્લાઈટ્સમાં કાપ મૂકવો એ તેમની મજબૂરી બની ગઈ છે.
ટાટા ગ્રુપ પર વધતું દબાણ
એર ઈન્ડિયા પહેલાથી જ ₹20,000 કરોડથી વધુના નુકસાનનો સામનો કરી રહી છે. હવે જ્યારે ટાટા ગ્રુપ અને સિંગાપોર એરલાઇન્સ આ એરલાઇનને ફરી બેઠી કરવાનો પ્રયાસ કરી રહ્યા છે, ત્યારે ઇંધણના વધતા ભાવે તેમની મુશ્કેલીમાં વધારો કર્યો છે. આ પરિસ્થિતિને કારણે આગામી સમયમાં હવાઈ મુસાફરીના ટિકિટ દરોમાં પણ મોટો ઉછાળો જોવા મળી શકે છે.
