મેટાની અનોખી પહેલ: ઝુકરબર્ગ જેવો જ દેખાતો 3D AI અવતાર કર્મચારીઓ સાથે કરશે વાત
તકનીકી દુનિયામાં હવે એવી કલ્પના કરવામાં આવી રહી છે કે જો તમારી સામે તમારો જ એઆઈ (AI) અવતાર હોય તો કેવો અનુભવ થશે. મેટા કંપની આ દિશામાં ગંભીરતાથી કામ કરી રહી છે અને તાજેતરના અહેવાલો મુજબ કંપની માર્ક ઝુકરબર્ગનું આર્ટિફિશિયલ ઇન્ટેલિજન્સ સંચાલિત 3D વર્ઝન તૈયાર કરી રહી છે. આ પહેલ કંપનીના મલ્ટી-બિલિયન ડોલરના વ્યૂહાત્મક ફેરફારનો એક મહત્વપૂર્ણ હિસ્સો છે. ફાયનાન્સિયલ ટાઇમ્સના અહેવાલ મુજબ, આ ફોટોરિયલિસ્ટિક 3D કેરેક્ટર એવો હશે જેની સાથે કર્મચારીઓ રિયલ ટાઈમમાં વાતચીત કરી શકશે અને તે ઝુકરબર્ગની ગેરહાજરીમાં તેમનું પ્રતિનિધિત્વ કરશે.
આ AI કેરેક્ટરને માર્ક ઝુકરબર્ગના હાવભાવ, અવાજ, વાત કરવાની લય અને જાહેર ક્ષેત્રમાં તેમના દ્વારા આપવામાં આવેલા નિવેદનોના આધારે ટ્રેન કરવામાં આવી રહ્યો છે. આ ઉપરાંત, કંપનીની રણનીતિઓ વિશે ઝુકરબર્ગના વિચારોને પણ આ મોડેલમાં પ્રોગ્રામ કરવામાં આવ્યા છે. ખુદ માર્ક ઝુકરબર્ગ આ એનિમેટેડ એઆઈની તાલીમ અને પરીક્ષણમાં વ્યક્તિગત રીતે રસ લઈ રહ્યા છે. આ પ્રોજેક્ટ હાલમાં પ્રાથમિક તબક્કે છે અને તેનો મુખ્ય ઉદ્દેશ્ય ઝુકરબર્ગને તેમના ઓપરેશનલ કામોમાં મદદ કરવાનો અને માહિતીનું ઝડપથી વિશ્લેષણ કરવાનો છે.
મેટાની સુપરઇન્ટેલિજન્સ લેબ્સ આવા વર્ચ્યુઅલ કેરેક્ટર્સને વાસ્તવિક દેખાવ આપવા માટે સખત મહેનત કરી રહી છે. જોકે, આ ટેકનોલોજી માટે પ્રચંડ કોમ્પ્યુટિંગ પાવરની જરૂર પડતી હોવાથી તેને મોટા પાયે લાગુ કરવી પડકારજનક છે. વોઈસ ઇન્ટરેક્શનને વધુ બહેતર બનાવવા માટે મેટાએ ગત વર્ષે પ્લે-એઆઈ (PlayAI) અને વેવફોર્મ્સ (WaveForms) જેવી બે વિશેષ કંપનીઓ પણ ખરીદી છે. જો આ પ્રયોગ સફળ રહેશે, તો મેટા આ ટેકનોલોજી ઇન્ફ્લુએન્સર્સ અને ક્રિએટર્સને પણ પૂરી પાડશે, જેથી તેઓ પોતાના ફેન્સ સાથે વાત કરવા માટે પોતાનું જ હાઈ-ફિડેલિટી AI વર્ઝન તૈયાર કરી શકે. નોંધનીય છે કે મેટાએ અગાઉ એઆઈ સ્ટુડિયો લોન્ચ કર્યો છે જે આ દિશામાં પ્રથમ કદમ હતું.
