કર્ણાટકના મૈસુરમાં રાહુલ ગાંધીએ આજે રાજ્ય સરકારની ગૃહ લક્ષ્મી યોજના શરુ કરાવી હતી.
આ કાર્યક્રમમાં કર્ણાટકના મુખ્યમંત્રી સિદ્ધારમૈયા, નાયબ મુખ્યમંત્રી ડીકે શિવકુમાર, કોંગ્રેસ અધ્યક્ષ મલ્લિકાર્જુન ખડગે, કોંગ્રેસ મહાસચિવ કેસી વેણુગોપાલ અને રણદીપ સુરજેવાલા ઉપસ્થિત રહ્યા છે. આ પ્રસંગે રાહુલ ગાંધીએ કહ્યું કે અમારી સરકારે ૧૦૦ દિવસમાં જ ચૂંટણીમાં આપેલા વચનો પૂર્ણ કર્યા છે.રાહુલ ગાંધીએ વધુમાં કહ્યું, ‘અમે તમને કહ્યું હતું કે ચૂંટણી બાદ કર્ણાટકમાં મહિલાઓને બસમાં મુસાફરી કરવા માટે કંઈ ચૂકવવું પડશે નહીં.
આ યોજનાને ‘શક્તિ’ નામ આપવામાં આવ્યું અને અમે તેને પૂર્ણ કરી છે. આ સિવાયની અમારી પાંચ યોજનાઓ જુઓ જેમાં એકને છોડીને બાકીની ચાર યોજનાઓ મહિલાઓ માટે બનાવવામાં આવી છે. આની પાછળ ઊંડો વિચાર છે.કર્ણાટક સરકારે ૧.૧ કરોડ મહિલાઓને ૨,૦૦૦ રૂપિયાની માસિક સહાય આપવા માટે ‘ગૃહ લક્ષ્મી’ યોજના શરૂ કરી છે. કોંગ્રેસ સાંસદ રાહુલ ગાંધીએ ડીબીટી દ્વારા ગૃહ લક્ષ્મી યોજનાના લાભાર્થીઓના બેંક ખાતામાં રકમ ટ્રાન્સફર કરી હતી. આ યોજના કોંગ્રેસ અધ્યક્ષ મલ્લિકાર્જુન ખડગેની હાજરીમાં શરૂ કરવામાં આવી હતી.
