આ વર્ષના અંતમાં ચીનના હાંગઝોઉમાં એશિયન ગેમ્સ ૨૦૨૩નું આયોજન થવાનુ છે. આ માટે ભારતીય ક્રિકેટ કંટ્રોલ બોર્ડે મોટો ર્નિણય લીધો છે. આ વખતે બીસીસીઆઈ પોતાની પુરૂષ અને મહિલા બંને ટીમોને એશિયન ગેમ્સમાં મોકલશે. એશિયન ગેમ્સમાં ક્રિકેટ ઈવેન્ટ ટી૨૦ ફોર્મેટમાં યોજવામાં આવે છે.
એશિયન ગેમ્સ જે સમયે યોજાવાની છે તે જ સમયે ભારતમાં વનડે વર્લ્ડ કપનું પણ આયોજન કરવામાં આવશે. આવી સ્થિતિમાં પુરુષોની બી ટીમને એશિયન ગેમ્સમાં મોકલવામાં આવશે. સુત્રોના અહેવાલ મુજબ બીસીસીઆઈ આ ઈવેન્ટમાં અગ્રણી મહિલા ખેલાડીઓ સાથે મજબૂત ટીમ મોકલશે. આ વખતે એશિયન ગેમ્સનું આયોજન ૨૩ સપ્ટેમ્બરથી ૮ ઓક્ટોબર સુધી થવાનું છે. જ્યારે ૫થી ૨૩ ઓક્ટોબર દરમિયાન વર્લ્ડ કપનું આયોજન થઈ શકે છે. બીસીસીઆઈ ૩૦ જૂન પહેલા જ એ ખેલાડીઓની યાદી મોકલશે જે એશિયન ગેમ્સમાં રમવા માટે મોકલવામાં આવશે.
આ પહેલા બીસીસીઆઈએ વર્ષ ૨૦૧૦ અને ૨૦૧૪માં રમાયેલી એશિયન ગેમ્સમાં ભારતની પુરુષ કે મહિલા ટીમને મોકલી ન હતી. ચીનના હાંગઝોઉમાં યોજાનારી એશિયન ગેમ્સના શેડ્યૂલમાં ક્રિકેટનો સમાવેશ કરવામાં આવ્યો છે. વર્ષ ૨૦૧૮માં જકાર્તામાં રમાયેલી એશિયન ગેમ્સમાં ક્રિકેટની ઈવેન્ટનું આયોજન કરવામાં આવ્યું ન હતું. ગત વર્ષે ઈંગ્લેન્ડમાં યોજાયેલી કોમનવેલ્થ ગેમ્સમાં ભારતીય મહિલા ટીમે ક્રિકેટ ઈવેન્ટમાં શાનદાર પ્રદર્શન કર્યું હતું. ટીમ ફાઇનલમાં જગ્યા બનાવી હતી. આ મેચમાં તેને ઓસ્ટ્રેલિયા સામે હારનો સામનો કરવો પડ્યો હતો. જાેકે ટીમ સિલ્વર મેડલ જીતવામાં સફળ રહી હતી.
વર્ષના અંતમાં ચીનમાં એશિયન ગેમ્સ-૨૩નું આયોજન બીસીસીઆઈ એશિયન ગેમ્સમાં પુરૂષ-મહિલા ટીમોને મોકલશે
