ભાવનગર સર ટી હોસ્પિટલના સિક્યુરિટી ગાર્ડ હડતાળ પર ઉતરી ગયા છે. હોસ્પિટલના નાઇટ ડ્યુટીના ૩૦ ગાર્ડ હડતાળ પર ઉતર્યા છે. સુપરવાઇઝરની તપાસ માટે નિમણૂક કરાતા વિવાદ થયો છે. હડતાળને પગલે હોસ્પિટલના ઉચ્ચ અધિકારીઓ દોડતા થયા છે. તો બીજી તરફ ભાવનગરની સર ટી હોસ્પિટલમાં આઉટસોર્સિંગના નામે કર્મચારીનું શોષણ થઇ રહ્યું હોવાનુ સામે આવ્યુ છે. આઉટસોર્સિંગના નામે કર્મચારીઓના શોષણમાં હોસ્પિટલના ઉચ્ચ અધિકારીઓની કોન્ટ્રાક્ટર સાથે મિલીભગતનો આરોપ લાગ્યો છે અને આ મિલીભગતની આડમાં એજન્સીઓ દ્વારા કર્મચારીઓનું શોષણ કરવામાં આવે છે
ગયા મહિને આઉટસોર્સિંગથી કામ કરતાં ૨૧૦ સિક્યોરિટી ગાર્ડને પગાર ચૂકવાયો છે. જ્યારે હકીકતમાં ૧૨૦ જ ગાર્ડ છે. ૯૦ ગાર્ડનો પગાર કોને ચુકવાયો ? આ મુદ્દો ચોક્કસથી તપાસ માગી લેનારો છે કારણ કે, સર ટી હોસ્પિટલમાં પેરા મેડિકલ સ્ટાફ, સિક્યોરિટી ગાર્ડ, નર્સ અને સફાઈ કામદારો સહિત આશરે ૭૦૦થી વધુ કર્મચારીઓ આઉટસોર્સિંગ એજન્સીથી કામ કરે છે અને આશ્ચર્યની વાત તો એ છે કે, આ માટે એક જ કંપનીને વર્ષોથી કોન્ટ્રાક્ટ અપાય છે. ત્યારે એ સવાલ પણ ચોક્કસથી થાય કે શા માટે વર્ષોથી પેધી ગયેલા કોન્ટ્રાક્ટરોની એકની એક એજન્સીને કામ આપવામાં આવે છે ?
પ્રાપ્ત વિગતો પર નજર કરીએ તો સર ટી હોસ્પિટલમાં છેલ્લા ૧૫ વર્ષથી માત્ર ૨ એજન્સીઓ પાસે માણસો ભરતી કરવાનો પરવાનો છે. જેમાં એમ જે સોલંકી અને ડી જી નાકરાણી એજન્સીનો સમાવેશ થાય છે. આ બંને એજન્સીઓ સર ટી હોસ્પિટલમાં સિક્યુરિટી ગાર્ડ, સફાઇ કામદાર, પટાવાળા, કોમ્પ્યુટર ઓપરેટરની ભરતી કરે છે. બંને એજન્સીઓ દ્વારા અલગ અલગ ૫૫૦થી વધુ સ્ટાફ પુરો પડાય છે. જાે કે એજન્સીઓ પર કર્મચારીઓના શોષણનો આરોપ કોંગ્રેસે લગાવ્યો છે.
હોસ્પિટલના આઉટસોર્સિંગ પરના કર્મચારીઓના શોષણની વાત કરીએ તો નિયમ મુજબ સરકાર પ્રત્યેક કર્મચારીને રૂ.૮૦૦નું યુનિફોર્મ એલાઉન્સ ચૂકવે છે, પરંતુ એકપણ કર્મચારીને આ એલાઉન્સ નથી મળતું. સરકાર દર મહિને બોનસ પેટે રૂ.૫૦૦ ચૂકવે છે, આ રકમ પણ કર્મચારીને નથી અપાતી. તો સરકાર વિના મૂલ્યે આઇ કાર્ડ ફાળવે છે, પરંતુ અહીં તો દર મહિને આઇ કાર્ડના નામે ૧૦૦ રૂપિયા વસૂલાય છે. તો ઁહ્લના નામે પણ છેતરપિંડી થતી હોવાનો આરોપ છે.
ભાવનગર શહેર ભાજપ પ્રમુખે સર.ટી.હોસ્પિટલમાં ચાલતા કથિત કૌભાંડ મામલે ચિંતા વ્યક્ત કરી છે અને રાજ્ય સરકારમાં રજૂઆત કરીને દોષિતો સામે કાર્યવાહી કરવાની તૈયારી દર્શાવી છે.
