Gold
ભારતે નાણાકીય વર્ષ 2023-24માં 48 દેશોમાંથી સોનાની આયાત કરી હતી અને કિંમતી પીળી ધાતુ પર અલગ-અલગ આયાત જકાત રાખવાનું કારણ ફ્રી ટ્રેડ એગ્રીમેન્ટ (FTA) હેઠળ દેશના વ્યૂહાત્મક વેપાર હિતો છે. શુક્રવારે સંસદમાં આ માહિતી આપવામાં આવી હતી.
રાજ્યસભામાં એક પ્રશ્નના લેખિત જવાબમાં, વાણિજ્ય અને ઉદ્યોગ રાજ્ય મંત્રી જિતિન પ્રસાદે જણાવ્યું હતું કે ભારત મેજર ફેવર્ડ નેશન (MFN)ના આધારે અથવા ફ્રી ટ્રેડ એગ્રીમેન્ટ (FTA)ના આધારે સોના પર આયાત જકાત લાદે છે.
MFN દરો હેઠળ, સોના પર આયાત જકાત છ ટકા છે, જ્યારે અશુદ્ધ સોનું (મિશ્રીત સોનું) માટે તે 5.35 ટકા છે. તેમણે કહ્યું કે, ભારતે નાણાકીય વર્ષ 2023-24માં 48 દેશોમાંથી સોનાની આયાત કરી હતી. તેમણે જણાવ્યું હતું કે સામાન્ય રીતે, અન્ય દેશો દ્વારા સોના પર ઓછી ડ્યુટીની માંગ પર FTA વાટાઘાટો દરમિયાન ચર્ચા કરવામાં આવે છે, જેનું મૂલ્યાંકન સ્થાનિક ઉદ્યોગના હિત અને આર્થિક બાબતો જેવા વિવિધ પરિબળોના આધારે કરવામાં આવે છે.
આસિયાન, કોરિયા, જાપાન અને મલેશિયા સાથે ભારતના વેપાર કરાર હેઠળ સોના પર વર્તમાન આયાત શુલ્ક શૂન્ય છે. ભારત-UAE વેપાર કરાર હેઠળ, 160 ટનના TRQ (ટેરિફ રેટ ક્વોટા) સુધીના સોના પર પાંચ ટકા અને સોનાની દોરી પર 4.35 ટકા ડ્યૂટી લાદવામાં આવે છે. આ જથ્થા ઉપર, કોઈ ડિસ્કાઉન્ટ નથી.
દેશની રાજધાની દિલ્હીના બુલિયન માર્કેટમાં શુક્રવારે સોનાની કિંમત રૂ. 1,100 વધીને રૂ. 92,150 પ્રતિ 10 ગ્રામની નવી ઊંચી સપાટીએ પહોંચી હતી. છેલ્લા ટ્રેડિંગ સેશનમાં 99.9 ટકા શુદ્ધતાનું સોનું 91,050 રૂપિયા પ્રતિ 10 ગ્રામ પર બંધ થયું હતું. નાણાંકીય વર્ષ 2024-25માં સોનાની કિંમત ગયા વર્ષે 1 એપ્રિલના રોજ 68,420 રૂપિયા પ્રતિ 10 ગ્રામની સરખામણીમાં 23,730 રૂપિયા એટલે કે 35 ટકા વધી છે. સતત ત્રીજા સત્રમાં વધારો ચાલુ રાખીને, 99.5 ટકા શુદ્ધતાનું સોનું રૂ. 1,100 ઉછળીને રૂ. 91,700 પ્રતિ 10 ગ્રામની સર્વકાલીન ઊંચી સપાટીએ પહોંચ્યું હતું.
