New Zealand
ન્યુઝીલેન્ડમાં નોકરી કરવા ઈચ્છતા લોકો માટે સારા સમાચાર આવી રહી છે. ન્યુઝીલેન્ડે વિદેશી કામદારોને દેશમાં આવવા અને કામ કરવાની મંજૂરી આપવા માટે તેના વિઝા નિયમોમાં ફેરફાર કરવામાં આવ્યો છે. કોવિડ રોગચાળાને કારણે ન્યુઝીલેન્ડના અર્થતંત્રને ફટકો પડ્યો હતો. જેના પછી તે હવે પર્યટન દ્વારા તેની ભરપાઈ કરવા માગે છે.
ન્યુઝીલેન્ડમાં દૂરથી કામ કરવા માટે તમારે ટેક્સ પણ ચૂકવવો પડશે નહીં. વિઝા નિયમોમાં છૂટછાટ બાદ, વિદેશીઓ ન્યુઝીલેન્ડમાં મુસાફરી કરી શકશે અને આ સાથે સાથે કામ પણ કરી શકશે. સોમવારે વેલિંગ્ટન એરપોર્ટ પર એક પ્રેસ કોન્ફરન્સમાં બોલતા, આર્થિક વિકાસ પ્રધાન નિકોલા વિલિસે જણાવ્યું હતું કે ન્યુઝીલેન્ડ સરકાર નવી યોજના દ્વારા દેશમાં ઉચ્ચ કુશળ લોકોને લાવવાનો પ્રયાસ કરી રહી છે. સરકાર ખાસ કરીને દક્ષિણ પૂર્વ એશિયા અને અમેરિકામાંથી કુશળ લોકોને આઇટી ક્ષેત્ર તરફ આકર્ષિત કરવા માગે છે. ન્યુઝીલેન્ડને આશા છે કે આનાથી પર્યટનને વેગ મળશે અને અર્થતંત્રમાં સુધારો થશે.
આર્થિક વિકાસ મંત્રીના જણાવ્યા અનુસાર “સરકાર માને છે કે નવા વિઝા નિયમો ન્યુઝીલેન્ડને વિશ્વના સૌથી પ્રતિભાશાળી લોકો માટે એક આવકારદાયક સ્થળ બનાવશે,” આર્થિક વિકાસ મંત્રી નિકોલા વિલિસે જણાવ્યું હતું. તેમણે કહ્યું, “અમે ઈચ્છીએ છીએ કે વિશ્વના વધુને વધુ સમૃદ્ધ અને પ્રતિભાશાળી લોકો આપણા દેશમાં આવે.” ગયા અઠવાડિયે, વડા પ્રધાન ક્રિસ્ટોફર લક્સને ‘ઇન્વેસ્ટ ન્યુઝીલેન્ડ’ નામની એક નવી પહેલની પણ જાહેરાત કરી હતી. તેનો ઉદ્દેશ્ય વિદેશી રોકાણને પ્રોત્સાહન આપવાનો અને આર્થિક વિકાસને વેગ આપવાનો છે.
નવા વિઝા નિયમો અમલમાં આવ્યા છે અને આ દ્વારા લોકો ન્યુઝીલેન્ડમાં તેમના રોકાણને પણ લંબાવી શકે છે. જોકે, જો કોઈ વ્યક્તિ 90 દિવસથી વધુ સમય માટે દેશમાં કામ કરે છે અને રહે છે, તો તેણે ટેક્સ પણ ચૂકવવો પડી શકે છે. લોકોને ફક્ત તેમના પોતાના દેશની કંપનીઓ માટે દૂરસ્થ રીતે કામ કરવાની મંજૂરી આપવામાં આવશે. તમે ન્યુઝીલેન્ડ આવીને અહીંની કોઈ કંપનીમાં કામ કરી શકતા નથી. ‘ડિજિટલ નોમેડ્સ’ જેવા વિઝા દ્વારા દૂરસ્થ કામદારોને કામ કરવાની મંજૂરી આપનાર ન્યુઝીલેન્ડ નવીનતમ દેશ છે. સ્પેન અને થાઇલેન્ડના લોકોને પણ ડિજિટલ નોમેડ્સ વિઝા આપવામાં આવી રહ્યા છે.
