Tax Collection
ભારત સરકારનું નેટ ડાયરેક્ટ ટેક્સ કલેક્શન ગયા વર્ષની સરખામણીમાં 15.4 ટકા વધીને રૂ. 12.1 ટ્રિલિયન ($143 બિલિયન) થયું છે. 1 એપ્રિલથી 10 નવેમ્બર સુધીના સમયગાળા દરમિયાન કલેક્શન વિશે માહિતી આપતા આવકવેરા વિભાગે જણાવ્યું હતું કે પ્રત્યક્ષ કર, જેમાં કોર્પોરેટ અને વ્યક્તિગત કરનો સમાવેશ થાય છે, આ સમયગાળા દરમિયાન કુલ ધોરણે 21 ટકાથી વધુ વધીને રૂ. 15 ટ્રિલિયન થઈ ગયો છે. આવકવેરા વિભાગે એમ પણ કહ્યું કે તેણે રૂ. 2.9 ટ્રિલિયન (રૂ. 2.92 લાખ કરોડ)ના ટેક્સ રિફંડ જારી કર્યા છે. વાર્ષિક ધોરણે 53 ટકાનો ઉછાળો છે.
ડાયરેક્ટ ટેક્સ કલેક્શનમાં રૂ. 5.10 લાખ કરોડનો નેટ કોર્પોરેટ ટેક્સ અને રૂ. 6.62 લાખ કરોડનો નોન-કોર્પોરેટ ટેક્સનો સમાવેશ થાય છે. રૂ. 35,923 કરોડના અન્ય ટેક્સ એકત્ર થયા હતા. સરકારે ચાલુ નાણાકીય વર્ષમાં પ્રત્યક્ષ કરમાંથી રૂ. 22.12 લાખ કરોડ એકત્ર કરવાનું બજેટ નક્કી કર્યું છે, જે પાછલા નાણાકીય વર્ષ કરતાં 13 ટકા વધુ છે.
ડાયરેક્ટ ટેક્સ એ એક પ્રકારની ફી છે, જે કરદાતા પર સીધી લાદવામાં આવે છે અને જે વ્યક્તિ પર તે લાદવામાં આવે છે તે સીધી સરકારને ચૂકવે છે. ડાયરેક્ટ ટેક્સ એવો છે જે કરદાતા અન્ય કોઈ પર લાદી શકે નહીં.
વડાપ્રધાન નરેન્દ્ર મોદીની આગેવાની હેઠળની સરકારના 10 વર્ષના કાર્યકાળ દરમિયાન ડાયરેક્ટ ટેક્સ કલેક્શનમાં 182 ટકાનો વધારો થયો છે. નાણાકીય વર્ષ 2023-24માં વ્યક્તિગત આવકવેરાની વસૂલાત લગભગ ચાર ગણી વધીને 10.45 લાખ કરોડ રૂપિયા થઈ ગઈ છે. 2014-15માં, મોદી સરકારના પ્રથમ વર્ષમાં, ડાયરેક્ટ ટેક્સ કલેક્શન લગભગ 6.96 લાખ કરોડ રૂપિયા હતું. તેમાં લગભગ રૂ. 4.29 લાખ કરોડ કોર્પોરેટ ટેક્સ અને રૂ. 2.66 લાખ કરોડનો વ્યક્તિગત આવકવેરો સામેલ છે. આવકવેરા રિટર્ન (સુધારેલા રિટર્ન સહિત)ની સંખ્યા નાણાકીય વર્ષ 2014-15માં 4.04 કરોડથી વધીને 2023-24માં 8.61 કરોડથી વધુ થઈ ગઈ છે.
