Pernod Ricard
Liquor Consumption in India: કંપનીના સીઈઓ એલેક્ઝાન્ડ્રે રિકાર્ડે જણાવ્યું હતું કે મજબૂત જીડીપીના કારણે ભારતમાં મધ્યમ અને ઉચ્ચ મધ્યમ વર્ગની સંખ્યા ઝડપથી વધી રહી છે. જેના કારણે મોંઘા દારૂનું વેચાણ વધી રહ્યું છે.
Liquor Consumption in India: ભારત હવે ફ્રેન્ચ લિકર મેન્યુફેક્ચરિંગ કંપની પેર્નોડ રિકાર્ડ માટે બીજું સૌથી મોટું બજાર બની ગયું છે. કંપનીના જણાવ્યા અનુસાર ભારતે ચીનને પાછળ છોડી દીધું છે. કંપનીના CEO એલેક્ઝાન્ડ્રે રિકાર્ડના જણાવ્યા અનુસાર, ભારતમાં તેમની પ્રીમિયમ પ્રોડક્ટ્સ એબસોલ્યુટ વોડકા, ચિવાસ રીગલ અને ગ્લેનલિવેટની માંગ ઝડપથી વધી છે. એલેક્ઝાન્ડ્રે રિકાર્ડ કહે છે કે ભારતમાં વધતી સમૃદ્ધિને કારણે આ તફાવત આવી રહ્યો છે.
વેચાણમાં અમેરિકા પછી ભારત બીજા ક્રમે છે
પેર્નોડ રિકાર્ડના ચેરમેન અને સીઈઓ કહે છે કે અમને ભારતીય બજારમાંથી સારા સંકેતો મળી રહ્યા છે. દેશની જીડીપી મજબૂત છે. મધ્યમ અને ઉચ્ચ મધ્યમ વર્ગની સંખ્યા ઝડપથી વધી રહી છે. તેમજ દેશમાં દર વર્ષે 2.5 કરોડ યુવાનો દારૂ પીવાની ઉંમરમાં આવી રહ્યા છે. ગયા નાણાકીય વર્ષ સુધી, ભારત કંપનીના વૈશ્વિક વેચાણમાં અમેરિકા અને ચીન પછી ત્રીજા સ્થાને હતું. કંપનીના કુલ વેચાણમાં તે લગભગ 10 ટકા યોગદાન આપતો હતો. જો કે, ભારત ઘણા વર્ષોથી વોલ્યુમની દ્રષ્ટિએ વિશ્વનું સૌથી મોટું બજાર છે. હવે ભારત 12 ટકા હિસ્સા સાથે અમેરિકા પાછળ બીજા નંબરે આવી ગયું છે. કંપનીના વેચાણમાં ચીનનો હિસ્સો ઘટીને 10 ટકા થઈ ગયો છે. અમેરિકા 19 ટકા સાથે નંબર 1 પર છે.
કંપની નાગપુરમાં એશિયાની સૌથી મોટી ડિસ્ટિલરી બનાવશે
એલેક્ઝાન્ડ્રે રિકાર્ડે કહ્યું કે કંપનીનું વાર્ષિક વેચાણ 11.5 બિલિયન યુરો છે. ભારતનો બિઝનેસ આમાં 1.38 બિલિયન યુરો (12,700)નું યોગદાન આપી રહ્યો છે. ગયા વર્ષે કંપનીએ ભારતમાં 20 કરોડ યુરોના રોકાણની જાહેરાત કરી હતી. તેઓ નાગપુર પાસે એશિયાની સૌથી મોટી ડિસ્ટિલરી બનાવવા જઈ રહ્યા છે. હાલમાં તે નાસિક પાસે એક ડિસ્ટિલરી ચલાવે છે. આ સિવાય તેમના દેશભરમાં 24 બોટલિંગ પ્લાન્ટ છે. તે ભારતમાં દર વર્ષે 35 મિલિયન યુરોનું રોકાણ કરે છે.
કંપનીની બ્રાન્ડ્સ ભારતીય વ્હિસ્કી માર્કેટમાં પ્રભુત્વ ધરાવે છે.
વિશ્વની બીજી સૌથી મોટી આલ્કોહોલિક બેવરેજ ફર્મ ભારતના વ્હિસ્કી માર્કેટના લગભગ એક ક્વાર્ટરને નિયંત્રિત કરે છે. કંપનીના ઉત્પાદનો બ્લેન્ડર્સ પ્રાઈડ, રોયલ સ્ટેગ અને ઈમ્પીરીયલ બ્લુ ભારતમાં સૌથી વધુ વેચાણ ધરાવે છે. કંપનીનો ભારતના પ્રીમિયમ વ્હિસ્કી માર્કેટમાં 42 ટકા હિસ્સો છે.
