TRAI New Rule
TRAI New Rule : TRAI સ્પામ કોલના નામે સતત છેતરપિંડીના મામલા પર કડક બન્યું છે. સરકારે ટેલિકોમ ઓપરેટરો માટે નવી સૂચનાઓ જારી કરી છે. નવો નિયમ 1 સપ્ટેમ્બર, 2024થી લાગુ થશે.
TRAIનો નવો નિયમઃ સ્પામ કોલના નામે લોકો સાથે સતત છેતરપિંડી થવાના મામલાઓ પર સરકાર કડક બની છે. ટેલિકોમ રેગ્યુલેટરી ઓથોરિટી ઓફ ઈન્ડિયા (TRAI) આ સંબંધમાં નવો નિયમ લાગુ કરવા જઈ રહી છે. આ નવા નિયમ હેઠળ જો કોઈ પ્રાઈવેટ મોબાઈલ નંબર પરથી ટેલીમાર્કેટિંગ કોલ કરે છે તો ટેલિકોમ ઓપરેટરોએ તેની સામે કડક કાર્યવાહી કરવી પડશે.
ટેલિકોમ સેક્ટરમાં અનિચ્છનીય કોલ દ્વારા છેતરપિંડી રોકવા માટે સરકાર લાંબા સમયથી કામ કરી રહી છે. ટ્રાઈ દ્વારા જારી કરવામાં આવેલ આ નિયમ 1 સપ્ટેમ્બર, 2024થી લાગુ કરવામાં આવશે. સરકાર દ્વારા દેશની તમામ ટેલિકોમ કંપનીઓને સૂચના પણ આપવામાં આવી છે.
ટ્રાઈનો નવો નિયમ શું કહે છે?
તાજેતરના સમયમાં, સરકારને સ્પામ કોલના નામે સતત છેતરપિંડી થવાની ઘણી ફરિયાદો મળી રહી છે. તેને ધ્યાનમાં રાખીને નવો નિયમ લાવવામાં આવ્યો છે. આમાં, જો કોઈ ખાનગી મોબાઇલ નંબર પરથી ટેલિમાર્કેટિંગ કૉલ કરે છે, તો તે નંબરને ટેલિકોમ ઓપરેટરો દ્વારા 2 વર્ષ માટે બ્લેકલિસ્ટ કરવામાં આવશે.
સરકારે ટેલીમાર્કેટિંગને લઈને નવી મોબાઈલ નંબર સીરીઝ બહાર પાડી છે. હવે બેંકિંગ અને ઈન્સ્યોરન્સ સેક્ટરે 160 નંબર સીરિઝથી જ પ્રમોશનલ કોલ અને મેસેજ કરવાના રહેશે.
તમને અનિચ્છનીય કોલ અને મેસેજથી રાહત મળશે
નવા નિયમના અમલ બાદ લોકોને અનિચ્છનીય કોલ અને મેસેજનો સામનો નહીં કરવો પડે. નવા નિયમમાં ઓટોમેટિક જનરેટ થયેલા કોલ/રોબોટિક કોલ અને મેસેજનો પણ સમાવેશ કરવામાં આવ્યો છે. TRAIના આ એક્શન પ્લાન પછી અનિચ્છનીય કોલ અને મેસેજ પર પ્રતિબંધ લાગશે.
ડિપાર્ટમેન્ટ ઓફ ટેલિકોમ્યુનિકેશનના ડેટા અનુસાર છેલ્લા 3 મહિનામાં 10 હજારથી વધુ છેતરપિંડીના મેસેજ મોકલવામાં આવ્યા છે. આ કારણે સરકારે છેતરપિંડી અને સ્પામ કોલને લઈને કડક વલણ અપનાવ્યું છે.
અહીં ફરિયાદ કરો
જો તમને આવો કોઈ કોલ અથવા મેસેજ આવે તો તરત જ ‘સંચાર સાથી પોર્ટલ’ પર તેની ફરિયાદ કરો. તમે તમારી ફરિયાદ 1909 પર પણ નોંધાવી શકો છો. હવે જોવાનું એ રહે છે કે સરકારના આ નવા નિયમની ટેલિકોમ ઓપરેટર્સ અને સ્પામ કોલર્સ પર કેટલી અસર પડશે.
