અક્ષય કુમાર છેલ્લા ઘણાં સમયથી ફ્લોપ ફિલ્મો આપી રહ્યો છે. એવામાં તેના ફેન્સ ઓહ માય ગોડ ૨ની રાહ જાેઈ રહ્યા છે. હાલમાં જ આ ફિલ્મનું ટીઝર રિલીઝ થયું છે. ફિલ્મની ઝલકીઓ જાેઈને લોકોની ઉત્સુકતા વધી ગઈ છે. હવે કેટલાક મીડિયા રિપોર્ટ્સમાં દાવો કરવામાં આવ્યો છે કે, ફિલ્મની વાર્તા હોમોફોબિયા પર આધારિત છે. આ વાર્તા ભારતીય સ્કૂલોમાં સેક્સ એજ્યુકેશનને જરૂરી કરવાની આસપાસ ફરશે. ઉલ્લેખનીય છે કે, હોમોફોબિયા એક પ્રકારનો એવો ભય છે જે લોકોને સમલૈંગિક લોકોને જાેઈને લાગે છે. લેટેસ્ટ રિપોર્ટ પ્રમાણે, ‘OMG 2’નો પ્લોટ એક સોશિયલ મીડિયા અકાઉન્ટ પર લીક થઈ ગયો છે.
આ પોસ્ટમાં દાવો કરવામાં આવ્યો છે કે, ફિલ્મની વાર્તા ગે છોકરાની આસપાસ ફરે છે, જેને કોલેજમાં વિદ્યાર્થીઓ ખૂબ પરેશાન કરે છે. છેવટે તે છોકરો આત્મહત્યા કરી લે છે. આ પોસ્ટમાં એમ પણ જણાવ્યું છે કે, આ ઘટનાથી ભાંગી પડેલા કોલેજ પ્રોફેસર (પંકજ ત્રિપાઠી) પ્રયાસ કરે છે કે, કોલેજમાં સેક્સ એજ્યુકેશન ફરજિયાત કરવામાં આવે. જેથી વિદ્યાર્થીઓને યોગ્ય માહિતી મળે અને રેગિંગ ઓછું થાય. આ વાતનો ધાર્મિક વિરોધ લોકો કરે છે અને તેને ઈશ્વરની રચનાની વિરુદ્ધ માને છે. આ વાર્તામાં ભગવાન શિવ (અક્ષય કુમાર)ની મદદ લેવામાં આવી છે. ફિલ્મ ‘OMG 2’માં પંકજ ત્રિપાઠી શિવ ભક્ત પ્રોફેસરની ભૂમિકામાં જાેવા મળશે.
યામી ગૌતમ વકીલના રોલમાં જાેવા મળવાની છે. અક્ષય કુમારને તો પોસ્ટર અને ટીઝરમાં શિવના રોલમાં જાેઈ જ લીધો છે. પોતાના ભક્ત માટે શિવજીનું રૂપ ધરીને તે પ્રગટ થશે. આ ફિલ્મનો ઉપર જણાવેલો પ્લોટ સાચો છે કે ખોટો તેની પુષ્ટિ તો ફિલ્મ રિલીઝ થશે પછી જ થઈ શકશે. જણાવી દઈએ કે, અક્ષય કુમાર અને પંકજ ત્રિપાઠી અભિનિત ‘OMG 2’ ૧૧ ઓગસ્ટના રોજ રિલીઝ થવાની છે. આ દિવસે સની દેઓલ અને અમીષા પટેલની ફિલ્મ ‘ગદર ૨’ પણ રિલીઝ થશે. એટલે બોક્સઓફિસ પર કાંટાની ટક્કર જાેવા મળશે તેમ કહી શકાય.
