Bharatiya Janata Party : ભારતીય જનતા પાર્ટીએ મુંબઈની ઉત્તર મધ્ય બેઠક પરથી ઉજ્જવલ નિકમને ટિકિટ આપી છે. ઉજ્જવલ નિકમ 26/11 કેસ સહિત ઘણા મોટા કેસમાં વકીલ રહી ચૂક્યા છે. ભાજપે પૂનમ મહાજનની ટિકિટ રદ કરીને ઉજ્જવલ નિકમને મેદાનમાં ઉતાર્યા છે. આ બેઠક પર ભાજપ લાંબા સમયથી મંથન કરી રહ્યું હતું. કોંગ્રેસે આ બેઠક પર વર્ષા ગાયકવાડને ટિકિટ આપી છે.
પીટીઆઈના અહેવાલ મુજબ, ભાજપના નેતાઓએ કહ્યું છે કે પૂનમ મહાજનની ટિકિટ રદ કરવાનો નિર્ણય સંગઠનાત્મક પ્રતિક્રિયાના આધારે લેવામાં આવ્યો હતો. જોકે થોડા સમયથી પૂનમ મહાજનની ટિકિટ કપાશે તેવા સંકેતો મળી રહ્યા હતા, પરંતુ પાર્ટીએ તેમના સ્થાને અન્ય ઉમેદવાર પસંદ કરવામાં સમય લીધો હતો.
પૂનમ મહાજનના પિતા પ્રમોદ મહાજનની હત્યા કેસમાં ઉજ્જવલ નિકમ પણ ફરિયાદી હતા. એપ્રિલ 2006માં વિવાદ બાદ પ્રમોદ મહાજનને તેના ભાઈ પ્રવીણે ગોળી મારી દીધી હતી. પૂનમ મહાજન ભાજપની યુવા પાંખના પૂર્વ અધ્યક્ષ પણ રહી ચૂક્યા છે.
દેશમાં યોજાયેલી છેલ્લી લોકસભા ચૂંટણીમાં, એટલે કે લોકસભા ચૂંટણી 2019, આ બેઠક પર કુલ 1679891 મતદારો હતા. તે ચૂંટણીમાં ભાજપના ઉમેદવાર પૂનમ મહાજન જીત્યા હતા, અને તેમને 486672 મત મળ્યા હતા. સંજય દત્તની બહેન પ્રિયા દત્ત કોંગ્રેસની ટિકિટ પર ચૂંટણી લડી હતી અને બીજા ક્રમે રહી હતી. 2014માં પણ પૂનમ મહાજને આ સીટ પર ચૂંટણીમાં પ્રિયા દત્તને હરાવ્યા હતા. મુંબઈમાં લોકસભા ચૂંટણીના પાંચમા તબક્કામાં 20 મેના રોજ મતદાન થવાનું છે.
