Lok Sabha Elections 2024: એનસીપી શરદ પવારે લોકસભા ચૂંટણી 2024ને લઈને પોતાનો મેનિફેસ્ટો બહાર પાડ્યો છે. આ ઢંઢેરામાં અનેક લોકલાડીલા વચનો આપવામાં આવ્યા છે. એવું કહેવામાં આવ્યું છે કે જો અમે સરકારમાં આવીશું તો પેટ્રોલ અને ડીઝલ પરનો ટેક્સ ઓછો કરવામાં આવશે. તેમજ સરકારી વિભાગોમાં ખાલી પડેલી તમામ જગ્યાઓ ભરવામાં આવશે.
એનસીપી શરદ પવારે પોતાના મેનિફેસ્ટોમાં મહિલાઓને નોકરીઓમાં અનામત આપવાની વાત કરી હતી. આ ઉપરાંત મહિલા સુરક્ષા અને મહિલા શિક્ષણ માટે કાયદો બનાવવાનું વચન પણ આપવામાં આવ્યું છે. NCP શરદ પવારે પુણેમાં આયોજિત એક કાર્યક્રમ દરમિયાન આ મેનિફેસ્ટો બહાર પાડ્યો છે.
જાહેર કરાયેલા આ જાહેરનામામાં સરકારી ક્ષેત્રમાં કોન્ટ્રાક્ટ પર કર્મચારીઓની ભરતી કરવાની પ્રથા બંધ કરવાનું કહેવામાં આવ્યું છે. આ ઉપરાંત જાતિના આધારે વસ્તીગણતરી કરવામાં આવે તેવું પણ કહેવામાં આવ્યું છે. સશસ્ત્ર દળોમાં મહિલાઓની ભાગીદારી વધારવા પર પણ ભાર મૂકવામાં આવશે. આ ઘોષણાપત્રમાં અગ્નિવીર જેવી યોજનાઓને સમાપ્ત કરવાની પણ વાત કરવામાં આવી છે.
