રૂફટોપ સોલાર સ્કીમઃ સરકાર સૌર ઉર્જા પર ઘણું ધ્યાન આપી રહી છે. વર્ષ 2025-26 સુધીમાં રૂફટોપ સોલાર પેનલથી 40 ગીગાવોટ વીજળીનું ઉત્પાદન કરવાનો લક્ષ્યાંક રાખવામાં આવ્યો છે.
- કેન્દ્ર સરકારે 1 કરોડ ઘરોની છત પર સોલાર પેનલ લગાવવાની નવી યોજના શરૂ કરી છે. વડાપ્રધાન નરેન્દ્ર મોદીએ હાલમાં જ આ યોજનાની જાહેરાત કરી હતી, જેને પ્રધાનમંત્રી સૂર્યોદય યોજના નામ આપવામાં આવ્યું છે. બજેટમાં આ યોજના માટે 10 હજાર કરોડ રૂપિયાની જોગવાઈ કરવામાં આવી છે.
લોકો ઘણું બચાવી શકે છે
નાણામંત્રી નિર્મલા સીતારમણે 1 ફેબ્રુઆરીએ વચગાળાનું બજેટ રજૂ કરતી વખતે રૂફટોપ સોલાર યોજના માટે 10 હજાર કરોડ રૂપિયાની જોગવાઈ કરી હતી. તેમણે એમ પણ કહ્યું કે આ યોજનાનો લાભ લઈને લોકો તેમના ધાબા પર વીજળી ઉત્પન્ન કરી શકે છે. છત પર સોલાર પેનલ લગાવીને, લોકો દર મહિને 300 યુનિટ સુધી મફત વીજળી મેળવી શકે છે, જે તેમને વાર્ષિક 15,000 થી 18,000 રૂપિયાની બચત કરી શકે છે.
વધારાની વીજળી વેચવાની સુવિધા ઉપલબ્ધ થશે
રૂફટોપ સોલાર સ્કીમ હેઠળ, લોકો માત્ર તેમના ધાબા પર ઉત્પન્ન થતી વીજળીનો ઉપયોગ કરી શકતા નથી, પરંતુ જરૂરિયાત કરતાં વધુ વીજળીનું વેચાણ પણ કરી શકે છે. પ્રધાનમંત્રી સૂર્યોદય યોજના હેઠળ લોકોને એક્સેસ વીજળી વેચવાની સુવિધા મળવા જઈ રહી છે. આ વીજળીનો ઉપયોગ ઇલેક્ટ્રિક વાહનોને ચાર્જ કરવા માટે પણ થઈ શકે છે. આ રીતે લોકો વીજળીના બિલમાં બચતની સાથે વધારાની આવક પણ મેળવી શકે છે.
સૌર ઉર્જામાંથી ઉત્પાદન ઝડપથી વધી રહ્યું છે
કેન્દ્ર સરકાર રિન્યુએબલ એનર્જીના સ્ત્રોતો પર ખૂબ ભાર મૂકી રહી છે. આ અંતર્ગત સરકારે સૌર ઉર્જાથી 100 ગીગાવોટ વીજળીનું ઉત્પાદન કરવાનો લક્ષ્યાંક રાખ્યો છે. છેલ્લા વર્ષોમાં સૌર ઉર્જામાંથી વીજળીના ઉત્પાદનમાં સતત વધારો થયો છે. નાણાકીય વર્ષ 2019-20માં જ્યાં સૌર ઉર્જાથી લગભગ 35 ગીગાવોટ વીજળીનું ઉત્પાદન કરવામાં આવી રહ્યું હતું, ચાલુ નાણાકીય વર્ષમાં આ ઉત્પાદન 73 ગીગાવોટને પાર થવાની ધારણા છે.
યોજનામાંથી આટલી વીજળીનો અંદાજ
પીએમ સૂર્યોદય યોજના હેઠળ 1 કરોડ ઘરોની છત પર રૂફટોપ સોલાર પેનલ લગાવવાથી સરકારને 100 ગીગાવોટનો લક્ષ્યાંક હાંસલ કરવામાં પણ મદદ મળી શકે છે. નિષ્ણાતોને ટાંકીને ETના રિપોર્ટમાં કહેવામાં આવ્યું છે કે 1 કરોડ છત પર સોલાર પેનલ લગાવીને લગભગ 20-25 ગીગાવોટ વીજળીનું ઉત્પાદન કરી શકાય છે. સરકારે 2025-26 સુધીમાં 40 ગીગાવોટ રૂફટોપ સોલર ક્ષમતાનું લક્ષ્ય નક્કી કર્યું છે.
