Data theft
Data theft: Xiaomi, TikTok, Shein સહિત 6 ચીની કંપનીઓ પર યુઝર્સનો ડેટા ચોરી કરવાનો આરોપ મૂકવામાં આવ્યો છે. ૧૬ જાન્યુઆરી, ૨૦૨૫ ના રોજ, ઑસ્ટ્રિયા સ્થિત હિમાયતી જૂથ, નોયબે આ કંપનીઓ વિરુદ્ધ ફરિયાદ નોંધાવી હતી, જેમાં આરોપ મૂકવામાં આવ્યો હતો કે આ કંપનીઓ ગેરકાયદેસર રીતે યુરોપિયન વપરાશકર્તાઓનો વ્યક્તિગત ડેટા ચીનને મોકલે છે. નોયબ ગ્રુપે અગાઉ એપલ, ગૂગલ અને મેટા જેવી મોટી કંપનીઓ સામે ફરિયાદો નોંધાવી છે, જેના પરિણામે આ કંપનીઓ સામે તપાસ અને ભારે દંડ ફટકારવામાં આવ્યો છે.નોયબ (નોન ઓફ યોર બિઝનેસ) એ જણાવ્યું હતું કે યુરોપિયન દેશોમાં ડેટા ટ્રાન્સફર અંગે ચીની કંપનીઓ સામે ફરિયાદ દાખલ કરવામાં આવી હોય તેવું આ પહેલી વાર બન્યું છે. ફરિયાદમાં ગ્રીસ, નેધરલેન્ડ, બેલ્જિયમ, ઇટાલી અને ઑસ્ટ્રિયામાં ડેટા સુરક્ષા ભંગનો ઉલ્લેખ કરવામાં આવ્યો છે. નોયબે આ કંપનીઓના વૈશ્વિક આવકના 4 ટકા દંડની માંગણી કરી છે. અલીબા (AliExpress), શીન, ટિકટોક અને શાઓમી જેવી ચીની કંપનીઓએ પોતે સ્વીકાર્યું છે કે તેઓ યુરોપિયન વપરાશકર્તાઓનો ડેટા ચીનને મોકલે છે, અને અસંખ્ય દસ્તાવેજો આ સ્પષ્ટપણે દર્શાવે છે.
Xiaomi એ આ મામલે કહ્યું કે તે આરોપોની તપાસ કરી રહી છે અને સરકારી એજન્સીઓની તપાસમાં સંપૂર્ણ સહયોગ કરશે. જોકે, અન્ય ચીની કંપનીઓએ હજુ સુધી આ મામલે કોઈ પ્રતિક્રિયા આપી નથી. યુરોપિયન યુનિયનના જનરલ ડેટા પ્રોટેક્શન રેગ્યુલેશન (GDPR) હેઠળ, વપરાશકર્તા ડેટા ફક્ત એવા દેશોમાં મોકલી શકાય છે જે ડેટા સુરક્ષા ધોરણોનું પાલન કરે છે.
નોયબના ડેટા પ્રોટેક્શન વકીલે જણાવ્યું હતું કે ચીન પહેલાથી જ ડેટા પ્રોટેક્શન નિયમોનું ઉલ્લંઘન કરવા માટે કુખ્યાત છે, અને યુરોપિયન વપરાશકર્તાઓનો ડેટા ત્યાં મોકલવો સંપૂર્ણપણે ગેરકાયદેસર છે. આ ડેટા સુરક્ષાનું ગંભીર ઉલ્લંઘન છે જેને તાત્કાલિક બંધ કરવું જોઈએ. TikTok જેવી કંપનીઓ પહેલાથી જ ઘણા દેશોમાં તેમની ડેટા સુરક્ષા નીતિઓને કારણે વિવાદમાં રહી છે, અને હવે યુએસ સરકાર પણ TikTok ને બંધ કરવાની તૈયારી કરી રહી છે. હાલમાં, યુરોપિયન યુનિયન આ ફરિયાદની તપાસ કરી રહ્યું છે.
