રશિયા અને યુક્રેન વચ્ચેનું યુદ્ધ હવે એકતરફી રહ્યું નથી. ડ્રોન હુમલાના કિસ્સાઓ સતત વધી રહ્યા છે. જ્યાં રશિયાએ ગુસ્સામાં યુક્રેન પર બે ખતરનાક તાજા મિસાઈલ હુમલા કર્યા. આ પછી હવે એવી માહિતી મળી છે કે રશિયાની રાજધાની મોસ્કોમાં આતંક મચાવવાના કાવતરાના ભાગરૂપે બે ડ્રોન હુમલા કરવામાં આવ્યા છે, જો કે, રશિયાએ આ બંને ડ્રોનને હવામાં તોડીને મોસ્કોને આતંકિત કરવાના મોટા ષડયંત્રને નિષ્ફળ બનાવ્યું છે.
તાજેતરનો હુમલો રશિયાની રાજધાની મોસ્કો નજીક કરવામાં આવ્યો હતો. રશિયન સેનાએ મોસ્કો તરફ જઈ રહેલા બે ડ્રોનને હવામાં તોડી પાડ્યા છે. આ ઘટના બાદ હવે તપાસ કરવામાં આવી રહી છે કે આ ડ્રોન હુમલાના હેતુ માટે ક્યાં મોકલવામાં આવ્યા હતા. મોસ્કોના મેયર સર્ગેઈ સોબ્યાનિને સોશિયલ મીડિયા પર હુમલાની માહિતી આપી છે.
બંને ડ્રોન અલગ-અલગ સ્થળોએ શૂટ કરવામાં આવ્યા હતા
તેમણે જણાવ્યું કે 9 ઓગસ્ટે બે ફાઈટર ડ્રોન રશિયાની રાજધાની તરફ આવતા જોવા મળ્યા હતા. તેમને જોઈને રશિયન સૈનિકો એલર્ટ મોડ પર આવી ગયા. મોસ્કોના દક્ષિણ બહારના ડોમોડેડોવો વિસ્તારમાં એક ડ્રોનને ઠાર કરવામાં આવ્યું હતું. બીજા ડ્રોનને શહેરના પશ્ચિમમાં મિન્સ્ક હાઇવે વિસ્તારમાં તોડી પાડવામાં આવ્યું હતું. હાલમાં ડ્રોનનો કાટમાળ નીચે પડતાં કેટલા લોકોને અસર થઈ છે તે જાણવા મળ્યું નથી. જો કે ઈમરજન્સી સેવાઓ સાથે જોડાયેલા લોકો સ્થળ પર હાજર છે.
અઠવાડિયામાં ત્રીજો હુમલો
રશિયન અધિકારીઓના જણાવ્યા અનુસાર, એક અઠવાડિયામાં મોસ્કો પર આ ત્રીજો ડ્રોન હુમલો છે. અગાઉ 6 અને 7 ઓગસ્ટે રશિયાએ યુક્રેનિયન ડ્રોન તોડી પાડ્યા હતા. અગાઉ રશિયા અને યુક્રેન વચ્ચેના યુદ્ધમાં યુક્રેન મોસ્કોને નિશાન બનાવી શક્યું ન હતું, પરંતુ હવે યુક્રેનના ડ્રોન મોસ્કો પહોંચીને હુમલાને અંજામ આપી રહ્યા છે.
પશ્ચિમી દેશો યુક્રેનની સાથે ઉભા છે. અમેરિકા સહિતના નાટો સંગઠનના દેશો ખુલ્લેઆમ યુક્રેનને સમર્થન આપી રહ્યા છે. આમ, હવે એવું લાગે છે કે લડાઈ યુક્રેન વિરુદ્ધ રશિયા નથી, પરંતુ પશ્ચિમ વિરુદ્ધ રશિયા છે.
