Income Tax Department: આવકવેરા વિભાગે કોંગ્રેસ પાર્ટીને 1,700 કરોડ રૂપિયાની રિકવરી નોટિસ મોકલી છે, આ માહિતી સૂત્રોને ટાંકીને બહાર આવી છે. દિલ્હી હાઈકોર્ટે ટેક્સ નોટિસને પડકારતી પાર્ટીની અરજીને ફગાવી દીધાના એક દિવસ બાદ કોંગ્રેસને આ નોટિસ મોકલવામાં આવી છે. સૂત્રોના જણાવ્યા અનુસાર, લેટેસ્ટ નોટિસ 2017-18થી 2020-21ના મૂલ્યાંકન વર્ષ માટે છે, તેમાં દંડ અને વ્યાજ બંનેનો સમાવેશ થાય છે.
કોંગ્રેસ પહેલાથી જ ભંડોળની અછતનો સામનો કરી રહી છે
આવકવેરા સત્તાવાળાઓ દ્વારા રૂ. 200 કરોડનો દંડ લાદવામાં આવ્યા બાદ અને ભંડોળ સ્થિર કર્યા બાદ કોંગ્રેસ પહેલેથી જ નાણાંની અછતનો સામનો કરી રહી છે. કોંગ્રેસને આ મામલે હાઈકોર્ટ તરફથી કોઈ રાહત મળી નથી. હવે પક્ષ સુપ્રીમ કોર્ટમાં જઈ શકે છે. તે જ સમયે, કોંગ્રેસ ભાજપ પર આરોપ લગાવી રહી છે કે તે લોકસભા ચૂંટણી પહેલા તેને આર્થિક રીતે દબાવી રહી છે અને તેની વિરુદ્ધ આવકવેરા અધિકારીઓનો ઉપયોગ કરી રહી છે.
તમને જણાવી દઈએ કે ઈન્કમ ટેક્સ વિભાગને ફેબ્રુઆરીમાં કોંગ્રેસના ટેક્સ રિટર્નમાં અનિયમિતતા મળી હતી. જે બાદ વિભાગે 200 કરોડ રૂપિયાનો દંડ ફટકાર્યો હતો. ઇન્કમ ટેક્સ એપેલેટ ટ્રિબ્યુનલ (ITAT) એ પક્ષને બાકી રકમ ચૂકવવા કહ્યું હતું અને તેમના ખાતાઓ ફ્રીઝ કરી દીધા હતા. તે જ સમયે, કોંગ્રેસનું કહેવું છે કે ટેક્સ ટ્રિબ્યુનલ દ્વારા તેના ભંડોળને ફ્રીઝ કરવાનો આદેશ “લોકશાહી પર હુમલો” છે, કારણ કે આ આદેશ લોકસભાની ચૂંટણી પહેલા આપવામાં આવ્યો છે.
દિલ્હી હાઈકોર્ટથી કોંગ્રેસને આંચકો.
દિલ્હી હાઈકોર્ટે ગુરુવારે કોંગ્રેસ દ્વારા ચાર વર્ષથી કરવેરા પુન: આકારણીની કાર્યવાહીની શરૂઆતને પડકારતી અરજીઓને ફગાવી દીધી હતી. સુપ્રીમ કોર્ટે ઈલેક્ટોરલ બોન્ડ્સ રદ્દ કર્યા બાદ લોકસભાની ચૂંટણીમાં રાજકીય પક્ષો માટે ફંડિંગ કેન્દ્રીય મુદ્દો બની રહ્યો છે. કોંગ્રેસ અને અન્ય વિરોધ પક્ષોએ કોર્ટના નિર્ણયને આવકાર્યો, જેણે ભાજપને સૌથી વધુ ફાયદો કરાવતી યોજનાને રદ કરી દીધી.
