રાજ્યના વાતાવરણમાં પલટો, વરસાદી માહોલ જામ્યો રાજ્યના અનેક વિસ્તારમાં ધોધમાર વરસાદ, વીજ કરંટથી ૪ પશુનાં મોત

રાજ્યમાં હવામાન વિભાગે અનેક જિલ્લાઓમાં વરસાદની પાંચ દિવસની આગાહી કરી હતી જેને પગલે આજે અનેક વિસ્તારોમાં ધોધમાર વરસાદ વરસ્યો છે. આજે વહેલી સવારથી જ અનેક જગ્યાએ મુશળધાર વરસાદ પડ્યો છે. આજે વાતાવરણમાં પલટો આવ્યો હતો અને વરસાદી માહોલ જામ્યો હતો. વરસાદને પગલે વાતાવરણમાં ઠંડક પ્રસરી ગઈ હતી. અનરાધાર વરસાદથી વાહનચાલકોને ભારે મુશ્કેલીનો સામનો કરવો પડ્યો હતો. રાજ્યમાં મેઘરાજાએ ધમાકેદાર એન્ટ્રી કરી છે. હવામાન વિભાગની આગાહી મુજબ જ આજે ખેડા, નડિયાદ, ડાકોર, વડોદરા, સાબરકાંઠ, આણંદ, દાહોદ સહિતના વિસ્તારોમાં અનરાધાર વરસાદ વરસ્યો છે. વરસાદને પગલે અનેક નિચાણવાળા વિસ્તારોમાં પાણી ભરાય ગયા હતા. આ ઉપરાંત વીજ કરંટથી ૪ પશુઓના મોત થયાના પણ સમાચાર છે. રાજ્યમાં છેલ્લા કેટલાય દિવસથી સતત ગરમીના કારણે લોકો અકળાયા હતા અને વરસાદની રાહ જાેઈ રહ્યા હતા ત્યારે વરસાદ પડતા લોકોએ રાહત અનુભવી હતી. આ સાથે અનેક વિસ્તારોમાં વાવણી લાયક વરસાદ થતા ખેડૂતોની ખુશીમાં વધારો થયો છે. આજે વહેલી સવારે વલસાડ અને વડોદરામાં વરસાદ પડ્યા બાદ રાજ્યમાં અનેક જિલ્લાઓમાં વરસાદ પડ્યો હતો.
આજે રાજ્યમાં સવારથી જ અનેક જગ્યાએ છુટોછવાયો વરસાદ પડ્યો હતો તો બીજી તરફ કેટલીક જગ્યાએ અનરાધાર વરસાદ વરસ્યો હતો. સાબરકાંઠાના હિંમતનગરના ગ્રામ્ય વિસ્તારમાં ધીમી ધારે વરસાદ વરસ્યો હતો. આ ઉપરાંત સાંબરકાંઠા જિલ્લાના ઈડર, વડાલી, ખેડબ્રમા, વિજયનગરમાં વરસાદ વરસ્યો હતો. આ સાથે જ આણંદ જિલ્લાના પણ વાતાવરણમાં પણ પલટો આવ્યો હતો અને સવારથી જ વરસાદ ખાબકતા અનેક વિસ્તારોમાં પાણી ભરાય ગયા હતા. રાજ્યમાં આજે પડેલા વરસાદમાં દાહોદ અને ડાકોરમાં પણ વરસાદ નોંધાયો છે. દાહોદ જિલ્લાના લીમડી, ઝાલોદ, લીમખેડા, ધાનપુર સહિતના તાલુકામાં વરસાદ વરસ્યો છે તો બીજી તરફ વરસાદને પગલે ભાજપ પ્રદેશ પ્રમુખ સી. આર પાટીલનો કાર્યક્રમ પણ રદ કરાયો હતો. દાહોદ ઉપરાંત ડાકોરમાં પણ વહેલી સવારથી જ વરસાદ પડ્યો હતો જેના કારણે ડાકોરમાં ઠેર ઠેર પાણી ભરાયા હતા. ડાકોર સહિત કાલસર, ધુણાદરા, આગરવા સહિતના વિસ્તારમાં ભારે વરસાદ પડ્યો છે.
ખેડા, નડિયાદ, માતર સહિતના પંથકમાં સવારથી જ વરસાદ પડી રહ્યો છે. વરસાદથી વાતાવરણમાં ઠંડક પ્રસરી ગઈ છે જ્યારે નિચાણવાળા વિસ્તારોમાં ગોઠણસમા પાણી ભરાયા હતા. નડિયાદમાં ખાનગી કોલેજની બસ ગરનાળામાં ફસાઈ જતા વિદ્યાર્થીઓને બસની બારીમાંથી બહાર કાઢવામાં આવ્યા હતા.
પંચમહાલ જિલ્લામાં ગત મોડી રાતથી વરસાદ વરસી રહ્યો છે. જિલ્લામાં ગાજવીજ સાથે વરસાદ વરસ્યો હતો. છેલ્લા બે કલાકની વાત કરવામાં આવે તો પંચમહાલમાં ૯૦ મીમી વરસાદ પડ્યો છે. આ ઉપરાંત વડોદરામાં ૬૯મીમી જ્યારે આણંદમાં ૬૧મીમી વરસાદ વરસ્યો છે.