Budget 2024
Union Budget 2024: સોનાની કિંમતો વધુને વધુ મોંઘી બની રહી છે, જે માંગ પર પ્રતિકૂળ અસર કરી રહી છે. આ કારણે સોના પરની ડ્યુટી ઘટાડવાની માંગ ઉઠી રહી છે.
જ્વેલરી બનાવવા અને રોકાણ કરવા માટે પસંદગીની ધાતુ સોનાના ભાવ સતત ઊંચા સ્તરે ચાલી રહ્યા છે. પાછલા કેટલાક દિવસોમાં થોડી નરમાઈ બાદ ભાવ ફરી એકવાર વધવા લાગ્યા છે અને હવે એક મહિનાની ટોચે પહોંચી ગયા છે. મોંઘા સ્તરને કારણે સોનાની માંગ પર અસર પડી રહી છે, કારણ કે લોકો સોનું ખરીદવાનો નિર્ણય મોકૂફ રાખી રહ્યા છે. દરમિયાન, બજેટને કારણે સોનાના ભાવ હળવા થવાની આશા વધી રહી છે.
કિંમતો એક મહિનાની ઊંચી સપાટીએ પહોંચી છે
આ અઠવાડિયે આંતરરાષ્ટ્રીય બજારમાં સોનું લગભગ 2 ટકા મોંઘું થયું છે. શુક્રવારે સ્પોટ ગોલ્ડ 2,411 ડોલર પ્રતિ ઔંસના સ્તરે બંધ થયું હતું, જે એક મહિનામાં તેની સર્વોચ્ચ સપાટી છે. સ્થાનિક બજારમાં પણ આ જ ટ્રેન્ડ ચાલ્યો અને શુક્રવારે, MCX પર ઓગસ્ટ એક્સપાયરી ગોલ્ડ કોન્ટ્રાક્ટ રૂ. 73,285 પ્રતિ 10 ગ્રામ પર બંધ થયો.
આ વર્ષે સોનું 15 ટકા મોંઘુ થયું છે
આ વર્ષની શરૂઆતમાં જે સોનાનો ભાવ 63,870 રૂપિયા હતો તે હવે 73 હજાર રૂપિયાને પાર કરી ગયો છે. મતલબ કે આ વર્ષ માટે સોનું હવે લગભગ 15 ટકા જેટલું મોંઘું થયું છે. તેની સીધી અસર માંગ પર જોવા મળી રહી છે. ETના અહેવાલ મુજબ એપ્રિલ-જૂન ક્વાર્ટરમાં દેશમાં સોનાની માંગ વાર્ષિક ધોરણે 15 ટકા ઘટી છે. વધતી કિંમતોને કારણે લોકો સોનું ખરીદવાથી દૂર રહી રહ્યા છે. બીજી તરફ લગ્ન માટે ઓછા શુભ મુહૂર્તને કારણે જુલાઈમાં સોનાના દાગીનાની માંગ વધી નથી.
જ્વેલરી ઉદ્યોગે બજેટમાંથી આ માંગણી કરી છે
બજારમાં સોનાની ઘટતી માંગને કારણે જ્વેલરી ઉદ્યોગ પરેશાન છે અને બજેટમાં સરકારના હસ્તક્ષેપની માંગ કરી રહી છે. જ્વેલરી ઉદ્યોગની માંગ છે કે સરકાર સોના પરની આયાત ડ્યૂટી 15 ટકાથી ઘટાડીને 10 ટકા કરે. તે જ સમયે, ઉદ્યોગના કેટલાક લોકો ડ્યુટી ઘટાડીને 4 ટકા કરવાની માંગ કરી રહ્યા છે. GJEPCને ટાંકીને પીટીઆઈના અહેવાલમાં સોના પરની આયાત ડ્યૂટી 15 ટકાથી ઘટાડીને 4 ટકા કરવાની માંગ કરવામાં આવી છે.
માંગ પૂરી થશે તો સોનું સસ્તું થશે
જો સરકાર બજેટ 2024માં ઉદ્યોગની આ માંગને સ્વીકારે છે તો માંગમાં વધારો થવાની આશા છે. કસ્ટમ ડ્યુટીમાં ઘટાડાથી સ્થાનિક બજારમાં સોનાની કિંમતો પર સીધી અસર પડશે અને સોનું ખરીદવું સસ્તું થશે. આવી સ્થિતિમાં બજેટ બાદ લોકોને સોનું ખરીદવાની સુવર્ણ તક મળી શકે છે. નાણામંત્રી નિર્મલા સીતારમણ 23 જુલાઈના રોજ નાણાકીય વર્ષ 2024-25નું સંપૂર્ણ બજેટ રજૂ કરવા જઈ રહ્યા છે.
