પીએમે કહ્યું કે દરેક જિલ્લામાં ઓછામાં ઓછી એક મેડિકલ કોલેજ સ્થાપવાની યોજના છે. તબીબી સેવાઓની બાબતમાં ભારત ઘણું પાછળ રહી ગયું છે ત્યારે વડાપ્રધાન નરેન્દ્ર મોદીએ આજે દાવો કર્યો હતો કે આગામી ૧૦ વર્ષમાં ભારતમાં રેકોર્ડ સંખ્યામાં ડોક્ટરો હશે. વડાપ્રધાને આજે ભુજ (કચ્છ) ખાતે નવી બંધાયેલી એક મલ્ટિ-સ્પેશિયાલિટી હોસ્પિટલનું વીડિયો કોન્ફરન્સિંગ દ્વારા ઉદ્ઘાટન કર્યું હતું. આ પ્રસંગે તેમણે જણાવ્યું કે આગામી સમયમાં દેશમાં ડોક્ટરોની કોઈ અછત નહીં રહે અને વિક્રમજનક સંખ્યામાં ડોક્ટરો હશે.
તેમણે કહ્યું કે કેન્દ્ર સરકારે દરેક જિલ્લામાં ઓછામાં ઓછી એક મેડિકલ કોલેજ સ્થાપવાની યોજના બનાવી છે જેથી ડોક્ટરોની સંખ્યા વધારી શકાશે.
ભુજ ખાતે આજે ૨૦૦ બેડની કે કે પટેલ મલ્ટિ-સ્પેશિયાલિટી હોસ્પિટલનું ઉદ્ઘાટન કરવામાં આવ્યું હતું. આ હોસ્પિટલ લેઉવા પટેલ સમુદાય દ્વારા બાંધવામાં આવી છે.
વીડિયો કોન્ફરન્સિંગથી સંબોધન કરતા પીએમે કહ્યું કે, આપણે દરેક જિલ્લામાં ઓછામાં ઓછી એક મેડિકલ કોલેજ સ્થાપવાની યોજના ધરાવીએ છીએ. આ ઉપરાંત મેડિકલ શિક્ષણ પણ દરેક વ્યક્તિની પહોંચમાં હોય તે માટે કામ કરીએ છીએ, જેથી આગામી ૧૦ વર્ષમાં દેશમાં વિક્રમ સંખ્યામાં ડોક્ટરો હશે.
મોદીએ જણાવ્યું કે, બે દાયકા અગાઉ ગુજરાતમાં માત્ર નવ મેડિકલ કોલેજાે હતી. પરંતુ છેલ્લા ૨૦ વર્ષમાં મેડિકલ એજ્યુકેશનની સ્થિતિમાં ઘણો સુધારો થયો છે.
હવે ગુજરાતમાં એક એઆઈઆઈએમએસ પણ છે અને બીજી ત્રણ ડઝન જેટલી મેડિકલ કોલેજાે છે. અગાઉ ગુજરાતમાં માંડ ૧૦૦૦ વિદ્યાર્થીઓને મેડિકલમાં એડમિશન મળી શકતું હતું. અત્યારે લગભગ ૬૦૦૦ વિદ્યાર્થીઓને આ કોલેજમાં એડમિશન મળે છે. રાજકોટ સ્થિત એઈમ્સે પણ ૨૦૨૧થી ૫૦ વિદ્યાર્થીઓને લેવાનું શરૂ કર્યું છે, તેમ તેમણે કહ્યું હતું.
- Latest
- Trending
