અત્યાર સુધી ઓક્સફોર્ડ, કેમ્બ્રિજ અને યેલ જેવી યુનિવર્સિટીમાં અભ્યાસ માટે ભારત ના વિદ્યાર્થીઓ ને વિદેશ જવું પડી રહ્યું છે જે હવે નહિ જવુ પડે કારણકે ગુજરાતના ધોલેરામાં 5000 એકર માં બની રહ્યો છે સાઉથ એશિયાનો સૌથી મોટો પ્રથમ સ્પેશિયલ એજ્યુકેશન રિજિયન.
જેમાં વિશ્વની શ્રેષ્ઠતમ યુનિવર્સિટીઓ પોતાના કેમ્પસ અહીં સ્થાપશે અને હાલ દુનિયામાં ઉપલબ્ધ એવાં લગભગ તમામ અભ્યાસક્રમો અહીં ભણાવવામાં આવશે.
ભારતીય વિદ્યાર્થીઓને વિશ્વની શ્રેષ્ઠ યુનિવર્સિટીમાંથી ડીગ્રી મેળવવા માટે લાખ્ખો ના ખર્ચે વિદેશમાં જવું પડી રહ્યું છે અને પોતાના દેશ અને પરિવાર થી દૂર રહેવાથી ઘણી મુશ્કેલીઓનો સામનો કરવો પડે છે, ત્યારે આજ યુનિવર્સિટીઓ હવે ભારત માં અને એમાંય ગુજરાત માં પોતાની પેટા સંસ્થાઓ સ્થાપશે જેનાથી વિદ્યાર્થીઓ ને ફાયદો થશે.
ગુજરાત સરકારે હાલમાં જ મુખ્યમંત્રી વિજય રૂપાણીની ઉપસ્થિતિમાં ધોલેરામાં ગુજરાત સ્પેશિયલ એજ્યુકેશન રીજિયન સ્થાપવા માટે તેલંગાણાની સેરેસ્ટ્રા વેન્ચર્સ નામની ભારતની સૌથી મોટી એજ્યુકેશન ઇન્ફ્રાસ્ટ્રક્ચર ફંડ સંસ્થા સાથે એમઓયુ કર્યાં છે, તે હેઠળ આ મોટું એજ્યુકેશન સેન્ટર બનવા જઇ રહ્યું છે.
સૌથી મોટી વિશેષતા આ એજ્યુકેશન રીજિયનની એ રહેશે કે અહીં વિદેશી મેડિકલ કોલેજીસ પણ આવશે. ગુજરાત અને ભારતના વિદ્યાર્થીઓને અહીં મેડિકલ સીટ ઓછી હોવાથી રશિયા, ચીન કે અન્ય દેશોમાં જવું પડે છે, તેવું નહીં બને. પ્રમાણમાં ઓછા ખર્ચે જ હવે ગુજરાતમાંથી પણ વિદેશી યુનિવર્સિટીમાં પ્રવેશ મળશે અને મેડિકલની ડિગ્રી ઉપલબ્ધ થશે.
આ સ્પેશિયલ એજ્યુકેશન રીજિયન શરુઆતમાં 1000 એકરમાં પથરાયેલું હશે અને તેના માટે 5000 એકર જેટલો વિશાળ વિસ્તાર અંકિત કરવામાં આવ્યો છે. તેની અંદર વિવિધ વિભાગોમાં યુનિવર્સિટી ડિસ્ટ્રીક્ટ, સ્કૂલ ડિસ્ટ્રીક્ટ, ડિસ્કવરી ડિસ્ટ્રીક્ટ, ઇનોવેશન ડિસ્ટ્રીક્ટ, ઉપરાંત કોમન ઇન્ફ્રાસ્ટ્રક્ચરમાં વિદ્યાર્થીઓ માટે હોસ્ટેલો, સ્પોર્ટ્સ કોમ્પલેક્સ, લાયબ્રેરી, રીક્રિએશન ઝોન, શોપિંગ અને ઘણી બધી સુવિધાઓ ઉપલબ્ધ હશે.
મુખ્યમંત્રીના અગ્રસચિવ મનોજ કુમાર દાસે જણાવ્યું કે, ઓક્સફોર્ડ જેવી યુનિવર્સિટીઓ ગુજરાતમાં કાર્યરત થાય તે આમ જોઇએ તો સ્વપ્ન જેવું લાગે છે, પરંતુ હવે આ સ્પેશિયલ એજ્યુકેશન રીજિયનને કારણે તે શક્ય બનશે. સેરેસ્ટ્રા જૂથને આ પ્રકારના એજ્યુકેશન ઇન્ફ્રાસ્ટ્રક્ચર ઊભાં કરવાનો બહોળો અનુભવ છે. ગુજરાત સરકાર આ પ્રકારનું એજ્યુકેશન રિજિયન બનાવવા માટે સેરેસ્ટ્રાને કોઇપણ ઇન્સેન્ટિવ પણ આપવાની નથી તેથી સરકારી તિજોરી પર તેનું ભારણ નહીં આવે. મુખ્યમંત્રી વિજય રૂપાણીએ આ પ્રકારના એક એજ્યુકેશન હબની ઇચ્છા રાખી હતી તે આવનારાં વર્ષમાં પૂર્ણ થશે.
મેડિકલ, એન્જિનિયરિંગથી માંડીને વિશ્વના તમામ કોર્સ માટેની જરૂરી તમામ સુવિધા જેવી કે હોસ્પિટલો, લેબોરેટરી, રીસર્ચ, જેવી સુવિધાઓ અહીં ઉપલબ્ધ હશે. વિશાળ કેમ્પસમાં અહીં આવનારા સમયમાં વિશ્વની 100 શ્રેષ્ઠતમ યુનિવર્સિટીઓ અહીં આવશે તેવું અમારું આયોજન છે. જે-તે યુનિવર્સિટીના નિયમો પ્રમાણે વિદ્યાર્થીઓને અહીંથી શિક્ષણ, પ્રમાણપત્રો અને પદવીઓ મળશે. પણ માત્ર ગુજરાત કે ભારત જ નહીં પરંતુ આખાં સાઉથ એશિયાના વિદ્યાર્થીઓ માટે આ એક શ્રેષ્ઠ તક હશે, કારણ કે એક જ સ્થળે આવાં એજ્યુકેશન હબ આ ક્ષેત્રમાં નથી કે જે અમેરિકા અને યુરોપના દેશોમાં છે.
